La zénèss i pèye son tare dann in sossyété détraké

22 séptanm 2023, sanm Justin

Mi koné pa si zot i suiv l’aktyalité bann fé-divèr. La pa toulmoune i suiv sa mé si zot i suiv, sirésèrtin zot va panss konm mwin lé zénèss i pèye la note dann in sossyété par sèrtin koté lé pa mal détraké.

Suisside, lassassina, androgaz, arsélman, arzoute èk sa demoune pèrdi pèrssone i artrouv pa zamé... Dopi in moi lékol la rantré, i antann arienk zafèr konmsa. Biensir la pa konm sak i éspass dann in péi an guerr mé kant mèm néna in bonpé jenn i artrouv azot dsou lo fé l’aktyalité an tan k’viktime, osinonsa an tan k’bouro é tazantan lé dë an mèm tan.

A soir-la mwin té pri dann lanboutéyaz shomin é mwin té apré ékoute la radio pou aprann lo dèstin in jenn fiye i apèl Shanna aparaman pri dann in pyèzz avèk in drol de rol zoué par dë jenn, in jenn fiye épi in jenn garsson… Alon pa di pliss pars nora in l’ankète é l’ankète-la va dévoil in parti la vérité. Pétète oui, pétète non mé antouléka sak i pé ésplike in n’afèr konmsa li lé for, li lé mèm pli for ké for for é si li ésplike, la pa sir ditou l’avé in solission pou gingn anpèshé…

Mézami l’om, la fam, épi jenn fiye konm garsson, nou la pa dé mashine. I pé ésplike pou kossa nou la fé tèl shoz, tèlshoz mé sépa si nou lé sir pars i pé ésplike in pé lé shoz mé pa avèk in sékirité d’san pour san. La mékanik wi pé ésplik son panne, si néna in lakssidan i pé di pou kossa é koman sa l’arivé a kondission ou lé pa in mékanissien gro doi. Dann in drame kozé par bann z’imin, dann la sossyété imène, la pal o ka mèm si la pèrssone i konfès son tor.

Apréssa déssèrtin va gingn tourne zot fime, pétète va ékri in roman sansa in fèyton, sansa ankor in pyèss mé ésplike toute dopi in poin dépar ziska in poin l’arivé, toussa la lé pa si fassil ké sa ! Nou la pankor ariv lo poin i pé démonte anou romonte anou, pou anpèsh lé shoz d’arivé… Alon arété, lo zour la pankor arivé pou loplito prévnir ké guérir dann noute sossyété-la.

A bon antandèr salu !

Justin

Padport

Signaler un contenu

Inn modékri, inn ti lavi, inn komantèr ?