Pou kossa mi di sa ?

Pé s’fèr sak mi di i ansèrv arien sirtou kan wi antann d’apré bann sondaz néna pliss katrovin pour san, prèss katrovin dis pour san lopinion piblik La Rényon i panss lang kréol La Rényon sa lé inportan é pou nout kiltir, pou nout lékol, pou nout rouvèrtir léspri, épi nout formassion.

Mé lé vré ké la pa toultan été konmsa. Fitintan tout laparèye assimilatèr té dréssé konm kok pou anpèsh nout kréol avanssé. Téi di : i fo pa bann madam an voi d’famiye i koz kréol pars zot zanfan nora in mové l’avnir. Néna in viss-réktèr ziska la anvoye in note pou anpèsh marmaye lékol koz kréol dann lo bann klass, konm dan la cour… Dann in télé ofissyèl l’avé fitintan kat kador la lang franssèz téi antour in militan la lang kréol pou anpèsh ali dévlope son kozé é son panssé pou mète la lang kréol anlèr.

zordi ankor néna bann jenn lé anpèshé d’pass in léprèv kréol dann bak é sa néna pwin si lontan k’sa mèm ké la jenn fiye lété pri dann train-la sé sète la gingn in konkour diskour an kréol La Rényon.. néna dé zané par-la.

Lé vré kan i di zordi néna troi amontrèr-èz lé agrézé dann kréol, in trantène amontrèr néna kapès épi par-la kat san profèssèr lé kalifyé pou amont kréol..pétète i pé dir la pi bézwin lité, la pi bézwin sélèb la viktoir kan la viktoir lé la ? Mi duré kan mèm k’i fo sélèb la viktoir kansréti pou alé pli lwin dann shomin in vré politik la lang matèrnèl La Rényon… D’ot va dir i fo ni ariv trap lo bilinguism é sé pou sa ké ni doi sélébré.

A bon antandèr salu !

Justin