Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, d’apré sak mi romark, ankor in foi zot i anparl patoi kréol, é konm d’abitid, zot i dpne ali pli d’ mérite ké li nana pou vréman. Koz kréol d’akor, mé a n famiy, sansa an parmi l’moun ou i koné bien é ou lé abityé frékanté. Pars la pa avèk nout patoi nou va nyabou mont dsi bann promyèr marsh la sosyété. Mi an souvien in moun intélizans téi di toultan, bann rouj-de-fon i vant kréol pou lé z’ot, mé pa pou zot épi pou zot famiy, pars dann z’ot shé soi, sé li fransé lo roi. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, mi tienbo a dir aou ankor in foi, in mansonz répété mil foi sar zamé in vérité. Kozman ou i sort dir i fé o moins sinkantan mi antann sa é tout bann militan la lang kréol la fine gingn kozman-la dan la vi : z’ot paran la gingn sa, zot la gingn sa par zot mèm, z’ot zanfan zordi i gingn sa ankor mé la pa pou sa k’lé vré, é la pa pou sa k’i anpèsh nout lang kréol avansé.

Pars matant, ou i vé, ou i vé pa, nout lang kréol i avans kisoi dann bann diskisyon anparmi, kisoi dann bann média, kisoi ankor dann bann prodiksyon artistik, é mi pé mèm dir dann bann konpozisyon litérèr : konm bann fonnkèr, pyès téat, film, traduksion. Dann la politik osi matant lo diskour dann la lang kréol i avans… Pti pa-pti pa, pa-za-pa.

Matant, ni pé koz san fin dsi in n’afèr konmsa, mé sa i anpèsh pa k’zordi dé la zourné internsyonal bann lang é bann kiltir kréol é pou in bop d’moun sa sé in gran fète zordi é in gran fète dsi konmsa, mèm an rèv, fitintan nou té i pans pa in n’afèr konmsa té riskab arivé, mèm an rèv ; Poitan l’arivé, é sa i kontinyé dann la diré. Tok ! Pran sa pou ou !