Vin désanm 1848, I aboli lésklavaz La Rénion. Demoun lé lib a partir so zour-la ? I fo pa di sa. I pé di la kondision lo zansien zésklav, suivan la loi, la shanjé : li lé pi la propriété in mètr, li lé pi in bien mèb, i pé pi vann ali, ashté ali, done bann zanfan konm éritaz, sépar lo bann famiy. Li na l’droi an avoir in bien san k’demoun i di li la volé. Dizon, lo kod noir i aplik pi.
Bann zésklav la gingn shakène in nom. Avansa zot lavé arienk in prénom : la pa in pti travay si i kalkil té falé fé sa an vitès. Déssèrtin nom lété bon nom, déssèrtin lété pou gaskoné : bann mètr lavé gro léspri.
Solman la vi bann moun la pa shanj zour pou zour : zot lavé sign in kontra langazman avèk z’ot ansien mètr donkalor zot téi fé mèm boulo épi zot téi viv dann mèm kondision.Bann zistorien i di konm de koi la vi té dir pou zot. Si tèlman dir, inn bann la arparti maron, dan lé o, sansa dann kan, la vni vakabon, volèr.Touléka, zot la arès mizèr mèm.
Vin désanm 1848, in fète la libèrté ? Oui, mé in libèrté i fo vanzé pou gingné : in bon komansman, pa in finision !

Justin