Mi koné pa si na in bonpé dmoun i ansouvien sa : nana bien lontan, lané 1960, mi kroi, dé lékip fotbal, inn té i sort Durban si mi tronp pa, l’ot té in lékip Natal, dann Lafrik di Sid. Avèk mon bann kamarad, moin la parti lardoute pou oir azot zoué. Alors mi souvien kan la fé oir lo dé lékip, tout bann zouèr té blan, blan mèm. Inn an parmi nou la di : "Oté ! La-ba lafrik domoun lé blan don ?".. Moin la rogrète moin vni oir match-la, Akoz sa lété dann tan l’Apartheid.
Apré lé shoz la bouz dousman:la fé la guèr dann lo péi, blan èk noir la tyé inn-a-l’ot, ziska i désid fé la pé, bat a tèr lapartheid, la vi séparé. Dopi 1990, ziska zordi la fé in révolission sosial : la pa sassine inn-a-l’ot, Firamézir la donn bann noir épi bann métis la plas i mérite azot dan la sosiété. Lékonomi i koul pa, i ranfors, Dan léspor, banna i tienbo zot ran. Ala lafrik di sid, shanpion !
Yèr soir moin la guète l’ékip, moin, lavé noir an parmi . Moin la vi inn, kan téi shant l’hymne nasional, son larm dézié té ki pèrl. Kossa li té apré kalkilé ? La-ba Johannesbourg noir èk blan i dans ansanm. Madiba*, out péi lé anlèr éstèr.

Justin

* lo pti nom Nelson Mandela.