Shak sam-dimansh, nana demoun i bouz, vik zot la bézoin bouzé... Pars landroi zot i rès, la vi zot i amènn, problèm zot nana dan la somènn i anpèsh azot byin réspiré, avoir kansréti in pti pé in santiman la libèrté.
Konm pou déssèrtin sa la pa assé, zot i azout ankor inn-dé zafèr pou pimant la vi. Mi konpran amoin, é zot ossi mi pans zot i konpran sak mi vé di !

Solman lé pa rar nana zaksidan ; lé pa rar nana lo mor, bléssé ; pa rar dmoun la vi lé fouti. Parl pa bann momon, bann papa, i oi zot zanfan partir an bone santé, épi artourn zot kaz dann in kès-do-boi.
Sam-dimansh i sort passé, moin la antann sak l’ariv in marmay dizuitan : d’apré sak i di dann télé, li la parti bordmèr, fé in fèt lanivèrsèr avèk son bann kamarad. La-ba, i di, li la boir in pé, lalkol la mont a la tèt, li la mont déssi in kap épi li la tonm dann fon dan la mèr an kolèr... L’èr mi ékri la pankor trouv son kor !

Mi pans, pou li, li l’avé pa mète son vi an danzé. Pou li, lalkol lété pa danzéré... Pou li konm pou in bon pé d’moun.
Donk la késtyon mi poz : sé koman fé konprann le moun lalkol lé danzéré, lalkol épi tout sak i sava ansanm, si bann kanpagn lésplikasyon i ansèrv de riyin. Koman fé konprann, konm di la romans : lalkol la pa bon mèm !

Justin