Asoir, la fèt ! Nana demoun partou dann shemin, loto, kamion, ziska le kar... foulé Baba ! Mé na touzour in plas pou in dalon, mèm pou in moun ou i koné de vu, sansa pou in moun ou i koné pa... la fèt, mi di aou, la fèt ! É pa pou plézanté !

Partou i bate maloya, kayanm, batavèk, ansanm roulèr ! Partou, demoun lé foulé ! I diré pa dann kartié - la nana si tèlmann moun ! Sirman na d’moun étranz ossi !
Jèn jan li ! Jèn fiy li ! Gramoun dann ta ! Boug ansanm bougrès lé déshéné... lé parti pou la soiré, lé parti pou près in nuit. Tan pi si demin lo kor lé krazé !

Tout lé pèrmi : mont an-o déssi kabine lo kar ou bien kamion... asiz déssi portièr loto, amèn loto kamarad kansréti, ou la poin pèrmi, sansa la loi la fine pran pou li... Boutèy lalkol i pass guèl-an-guèl, zordi nou lé frèr, zordi nou lé sèr, zordi mi èm zot tout, zordi i fé ninport de koué ! Zordi i di ninport de koué !

La pa loin, toulmoun lé an luil !

Na in ga lé asiz déssi port loto, lo kor pandiyé dann vid. Li larg son dé bra épi li tienbo avèk lo pié ropliyé. Demoun i bat la min. Tanpir li fé lakrobat, tanpir demoun i aplodi. Sa in marmay vanté dann son kartié ! Sa in marmay i grat pa le popièr.
Mé kossa i ariv, akoz loto i brout konm sa ? Akoz li avans par soukous ? Pèz laksélératèr... pèz lo frin... apiy déssi lanbréyaz... aksélèr... frèn... aksélèr... frèn... Tansion pangar ! Tro tar ! Tro tar baya !

Lalkol, ou té pa an tro ou la-dan ?

Justin