Bon Dië la di Abraham konmsa : alé avèk out zanfan-tousèl, Isaac, dann péi La Morija. Kan ou v’ariv la-ba sakrifié ali ; oubli pa out gran-kouto épi doboi konm dabitid*. Abraham la fé sak bon dié la di ali.Kan lariv landroi li té i sava tié son zanfan, in l’anz la ranplas lo z’anfan par in mouton. Dann la rolijion bann mïzïlman i apèl sa, la fèt de l’Aid el Kebir.
Lané 2006, fèt-la la tonm moi d’désanm, le 30. Zour-la, lo spès gouvèrnman bann zamérikin la mèt dann l’Irak, la désid fé mèt la kord dann kolé Saddam Hussein pou bann krim li la fé fèr dann péi bann Chiites. Bann zamérikin lavé anons sa an promié. Son bann bouro, kagoul sü zot tèt, la maltrèt ali dëpü komansman ziska la fin. Lo boug té i di pa arien, li té i résit solman la prièr pou bann mor. Li la défann mèt in kagoul sü son tèt. Li lé mor konm in brav.
Astèr son bann famiy la mèt son kor dann landroi li lé né. Astèr in bon pé bann mizilman va di : sa in martir** épi va fé pélrinaz sü son tonm. Té oblizé fé in n’afèr konm sa ? Lavé poin asé dézord, asé lo mor dann péi-la , pou fé in bétiz konm sa. Oté bann zamérikin ! kèl koté zot tèt lé déviré don ?La pa intélizan sak zot la fé la. Zot lé pa lo péi l’intélizans ! Zot lé solman lo péi central intelligence agency (la C.I.A).

Justin

*Dann tan-la bann juif té i fé sèrvis zanfan kan bon dié téi doman, soi-dizan. **chahid correspond au martyr d’un musulman qui a sacrifié sa vie pour la défense de l’Islam.