Dizon l’amityé lé frajil. Li lé pa tayé dann rosh mé konm lo saz l’afrik i di, dsi lo sab. Mi koné pa si konm moin zot la gingn étan marmaye alé vakans bord’mèr : kisoi in zourné avèk in koloni, kisoi in zourné avèk la famiy. Mé si zot la gingn lokazyon-la, moin lé sir zot la zoué konm moin : ou i fé in désin dsi la sab, pa tro loin, pa tro pré bord’mèr avèk in mèr i sava i vien é momandoné-san di arien pèrsone-lo vag i éfas out désin. Si ou i bouz pa, ou i gingn pi arfé lo désin. L’amityé i kontant pa avèk in vag rolasyon : si ou i éloign tro, tro lontan, out l’amityé résiprok i disparète. Li la bézoin ronouvèman. Lé konmsa é pa otroman. Alé ! Mi kite azot rofléshi la dsi é ni artrouv pli d’van. Sipétadyé !