Mésyé, Médam, La sosyété koz èk moin sé koz èk in kouyon, mé sé o pyé d’lo mir k’i oi lo mason. Mé zami, si in kékshoz i ral aou pou vréman ébin ou i fé lo nésésèr pou ariv o bi. Sa sé in kozman lé vré dann in bonpé d’ka : kisoi dann zistoir l’amour, kisoi dann in prozé pou l’avnir, kisoi ankor pou réaliz in l’anbisyon. Mé soman in pti l’anvi tyèd-tyèd i sifi pa, i fo néna in gro l’anvi, in volonté ni pé dir. A pa konfonn volonté avèk vélléité ! Sa la pal o mèm zafèr ditou. Pars si ou na poin la volonté, initil lans aou dann kékshoz. An plis si d’moun l’apré konsèye aou pou fé si, pou fé sa pars konm lo provèrb i di : « La pa sak i done la rou i ral sharète ! ». Alé ! Mi kite azot rofléshi la dsi é ni artrouv pli d’van. Sipétadyé.