Médam zé Mésyé, la sosyété, nou l’apré anparl papang é ni pans si li lé la kékpar dsi bor ranpar la pa pou amizé, la pa pou fé zoli, mé pas la natir i komann ali pou ète la. Pars, fransh vérité bann zanimo i rèss pa dann in landroi a ramass lo mou. Zot la pa konm nou zot : nou ni zoué, ni amiz, ni tourn ni vir : konmsa mèm ni amenn nout vi an sosyété. Zanimo lé pa konmsa zot : si zot i tourn i vir dann in l’androi sé pars zot néna kékshoz pou fé. Si zot i prélass sé ké zot la bézoin ropozé. Zot i suiv zot natir, zot linstin. Mé antansyon, nou l’apré anparl in provèrb la : papang sé bann moun a tou fèr, la proi sé lo bien d’moun, sansa lo moun li mèm… Donk alon méfyé ! Si ni oi dann nout landroi bann moun a tou fèr i débark, alon méfyé ! Alé, mi kite azot rofléshi la dsi é ni artrouv pli d’van. Sipétadyé !