Yèr matin, la radio l’anons lo désé Lucien Johany. Moin lé sir, in bonpé d’moun i koné pa li dsou so nom-la. Mé si i di azot Roséda, mi pans in takon d’moun i koné la troup Roséda. I koné ali par rapor in gran mètre, lé ankor vivan, épi na souvan dé foi lokazyon mète maloya tradisyonèl anlèr : li apèl Gramoune Sello. Lucien Johany lété in manm fondatèr lo group Roséda.

Roséda, sé in takon shanson konm : Mon Zalimèt, Bal komèr, La di la fé, Zenn zan zordi, Sakivé dansé, Vin désanm, Maloya épi d’ot ankor. Avèk bann shanson-la, zot la mont dsi tout sène La Rényon épi zot la parti osi dann péi déor. Sé pou la rézon, Maloya èk Roséda sa lé soudé konm dé doi in min, sa i fé pa dé, mé inn.

Pou tou sak konm moin la konète lo bann konba pou lo maloya, é bin, Roséda té pou nou, shak foi nou té i antann é nou té i oi ali, shak foi in kasète, in disk té i parèt, konm in gran réspirasyon, konm nout konfyans dan lo konba kiltirèl lo pèp l’apré améné par lintèrmédyèr bann zarboutan. La té pa in késtyonn parti, té pa in késtyon lopinyon politik, lo sèl zafèr té i kont pou nou lété la prèv nout pèp té i lèv la tète.

Dopi lané 2000, Lucien Johany lé pi dan la limyèr bann médya. Li la vni dsi la sène pou lo vintyèm anivèrsèr lo group Roséda, épi kan Gramoun Sello la fète son trant zané karyèr. Demoun konm Lucien Johany, sa la lès anou in bon patrimoine, li konm lé zot zarboutan nout kiltir. Landroi zot i lé, mi pans zot i doi ète fyèr épi kontan. Maloya lé ankor bien vivan !

Justin