Dann in n’ané, nana dé zour k’i kont akoz zot lé inportan, akoz i éspas déssèrtin z’afèr lé valab, lé mèm tro valab. Dann lané nana déssèrtin zour i lès pa la tras, akoz i éspas pa in n’afèr valab. Sa lé vré pou bann pèp, konm pou in moun pèrsonèl...Touléka, la pa vantredi trèz moi d’jin, sé in zour k’i kont pa, in zour banal, in zour mol. Sé mèm lo kontrèr.
Pou nou, dann loséan indien la pa in zour insigifian, la pa in zour mol. Akoz ? Akoz bann péi la C.O.I, la déside mète ansanm pou prépar lavnir épi la parl déssèrtin z’afèr i garanti nout lavnir : lénèrzi dirab, lo dévlopman dirab épi la sékirité alimantèr. Azout èk sa tout lo bann péi la désid, pou inméyèr lavnir,travay ansanm, koz parèy pou bann késtion lé kapital pou nout tout.
Alors bann lintéréssan, sak téi kritik pou kritiké,sak lé pli intélizan k’lé z’ot, lo bann i pans lé rénioné i pé pa anvoir bon z’idé, mi mazine z’ot figir l’asiz. Mé la pa sa ki kont ! Kont pa déssi zot pou fé z’ot miarkilpa (mea-culpa ?). Sak lé inportan sé sak moin la di an-o la, lo mète-ansanmpou prépar lavnir. Si sak mi pans lé vré, nou va niabou dir : « nana in tan avan lo trèz moi d’jin épi in tan apré lo trèz moi-d’jin »
Pou l’Erop ossi la pa in zour rodinèr akoz l’Irlande la niabou pass in klé malgash dann kolé lo trété éropéin, la pass sa kal, la vir sa ki-déssi tète. Sa galman la éspas lo trèz moi d’jin lané 2008. Lété in vantredi !

Justin