Mon vré dalon i apèl Zanbash. Dépi nou té i mète kilote gronouy, ni koné anou. Mi pé di toute sak li pans mi koné, é vèrsi-vèrsa, toute sak mi pans li koné. Mon kontan sé son kontan, mon doulèr sé son doulèr, é invèrsman. Dizon li sé mon doub é moin sé la syène. Na aryink in n’afèr nou lé pa tro d’akor : mi trouv li lé in pé séktèr. Li arprosh amoin pa z’ète pli dir.

Mon dalon Zanbash la di :
Lang kréol-la, sa lé anou, Rényoné. Sé lang la i doi tiliz partou é toultan. Kan mi antan bann nasyon kréol rényoné, rantre zot, apré koz fransé, mon gaz i monte. Moin na pi d’konvèrsasyon pou an avoir avèk Rényoné k’i ronyé son lang. Koz an "zé-ti-toi", konte pa dsi moin ! Moin lé alèz an kréol rényoné, pou kossa mi sava mète mon pyé dann soulyé pou ramass zanpoul ?

Moin la fé ali pou répons :
Moin lé dakor pou donn kréol rényoné toute son plas. Pa aryink dann bann konvèrsasyon privé, mé galman dann bann lyé piblik, konm bann l’administrasyon, tribinal, lékol tousala. Mé moin lé dakor ossi kant in pé i di "lo kréol épi lo fransé". Lé dé ansanm, lé dé byin konm k’i fo. Mi ème pa kan i déform nout lang rényoné, mé moin lé pa pou k’i koz fransé an mayi kass-an-dé. Mi an-pans zot i konpran amoin.

Justin