Néna si tèlman lontan i sobatkoz dsi la plas lang kréol, dann lansègnman. I sort dépi zéro, ziska in pti pé : zis sak i fo, tro la pa bon... Soman, sak mi an apèrsoi, sé k’i avans pa pou vréman. Mèm dépi i apèl sa LCR. Akoz nana in pé i rod arienk mète ali koud kar d’min dann kolé.
Akoz, parlfèt, mèm si bann tèks i pèrmète amontr lang kréol-la, bann mazistra lédikasion nasional i ménaz pa pou mète zanbèk, pou anpèsh kréol bien rant dan la kaz, donn ali in plas bordaz dann far-far, dann milié trénas moulal.

Déssèrtèn foi, i antan kréol i pé donn la min pou pèrmète aprann fransé pou bann marmay léspri in pé anklavé : donkalor, sa i vé dir k’i fo pa amontr kréol par li-mèm, konm zarboutan nout kiltir, épi konm ni di li sé prémié zéklèr goudsèl nout pèp, non mé li doi ète konm in pti dalon la lang fransèz, in sort valé koté lo mète.

Non lé ga ! Sa sé in nafèr i pé pa kontante anou ! Konbien lo tan nou l’apré vanzé pou k’nout kréol i tonm pa mortibis-krévatizès, pou k’la kiltir kréol i donn son frui, i donn son flèr. Zot i konpran, nou lé pou inn, nou lé pou l’ot, mé dann réspé l’inn-a-l’ot...Touléka, lang kréol i marshpiéra pa pèrsone !

Justin