Médam zé Mésyé, la sosyété, si mi domann azot in zour kosa in lang i ansèrv, moin lé prèss sir in pé va réponn amoin in lang i sèrv pou kozé, é aprésa si zot i rofléshi zot lé riskab dir amoin, in lang i ansèrv pou kominiké. Lang pou kominiké isi shé nou ! Lang mazoritèr pou kominiké rantre nou ! Néna d’ot konm la lang bann fransé, lo chimaoré, épi d’ot an kor i fé pa l’invantèr zordi mé noré a dir la dsi.

Ni pé di, san tronp anou, la lang kréol rényoné sé lo prinsipal lang i ansèrv dann la kominikasyon popilèr… Kominiké sé kozé, sé antann, ésjhanjé, sé fé pass la paroli konm par ékri kouran la vi dann nout sosyété.. Mi rapèl, in zour, moin lété apré fé in kour dsi la kiltir popilèr kréol rényoné é l’avé in madam dann mon kour-an parmi bann zétidyan.. El téi ékout amoin bien, vèye pa, é dann mon kèr, moin téi di avèk in lékoutèz konmsa lé pa l’èr pou di la koyonad.

Kour fini, èl i vien oir amoin épi èl i di : « Moin osi mi doi fé kour dann kréol rényoné dsi la kiltir. Moin lé kontan pars mi oi lé posib fé ! ». L’èrla mi di aèl kalkil bien é ou va oir par ou mèm, nout lang kréol rényoné sé in lang litérèr pou ou, pou moin, pou tout sak i pans la kiltir popilèr i pouss dann bon téro nout lang kréol rényoné.

Mi pans dopi tan-la èl la sirman fé son sémin é moin, moin la fé la myène é moin la dékouv zour an zour, nuit an nuit néna in kréasyon kilirèl isi shé nou é pa arienk zordi-dopi nout pèp la invant nout lang é li la afirm ali konm pèp avèk son kltir popilèr bazé dsi in zoutiy éstraordinèr pou nou la lang kréol rényoné, nout lang litérèr.

Mézami kan mi ékout in zoli shanson kréol La rényon, kan mi lir in gayar zistoir, kan bann paroli maloya i pass dann mon tète, kan mi résite in zoli fonnkèr, mèm kan mi antan in kosa in shoz épi d’ot zéléman nout kiltir rényoné mi koné bien sé par nout lang kréol rényoné li parvien. Nout lang kréol rényoné, nout zarlor, promyé mark lo jéni nout pèp.

L’èrla, si lo madam mi anparl zordi i antann amoin, si èl i lir amoin par azar mi rodi avèk èl : oui ! Nou néna in lang litérèr é lang-la sé nout kréol rényoné.