Mi koné pa si zot la ékout in pé Sarko épi son bann dalon kozé, mé si zot la antann bann kozman-la, mi pans zot la fini par konprann kèl gran problèm nana, zordi, dan la France. Pars pou okip zot tan èk sa, i doi zèt in famé tablatir, vi k’i arsanm li lé pli sèryé ké la kriz l’ékonomi, li lé pli mové ké lo shomaj, li la fine larg la kriz l’arzan piblik pou kapar promyé plas dan la danzérézité. Problèm la, sé halal ! Halal ? Oui mon bann dalon. Si tèlman ké Sarko li-mèm, son Promyé minis Fillon, son minis l’Intèryèr i mank pa, shak foi nana in mikro braké dsi zot, anparl la vyann halal.
Kosa i lé sa par l’fèt ? Sinploman la vyann z’animo tyé suivan la téknik bann mizilman. Pou lo rès, domann pa moin tro, alé oir zot mèm dsi internèt pou konèt lo plis détaye. Mi pé zis dir azot, bann mizilman La Rényon i manj la vyann halal, é moin personnel, mi oi pa kosa lé pa bon la-dan. Astèr, bann Sarko i trouv moiyin dir, sa i mèt an danzé la Répiblik pars, sanm pou zot, sa in manyèr tourn lo do la loi répiblikèn é ranplas sa par lo kominotaris. Lé vré, ni marsh dsi z’éléksyon prézidan la Répiblik é in pé i pans tout z’afèr lé bon pou gingn z’éléktèr. Moin la bien pèr, pou zot, dan sèt afèr, zot na plis la shans tonm a-tèr plito ké mont anlèr. Z’éléktèr la pa osi bèt zot i kroi !
Touléka, mi trouv pa tro joli diviz demoun konmsa, mont in pé kont lé zot sinploman pou in z’éléksyon. Nou La Rényon, sa in n’afèr i va pa nou. Nou na z’ansèt i sort in pé partou, nou na in bonpé rolijyon, nou na in bonpé z’abitid, sa i kont pou nou. Tout nout z’ansèt i kont pou nou, é ni pran tout san zèt in pé. Larg anou in pé ! Dan nout z’ansèt na poin triyaz !

Justin