Haïti, sa in péi mizèr pou vréman. Katrovin-pour-san son popilasyon i viv dan la mizèr noir. Bann famiy i mète zot zanfan pou fé zésklav pou bann rish. Bann pov i fé galète la bou pou pa mor d’fain... bann marshandiz inporté la rouine bann prodiksyon l’agrikiltir... arzoute èk sa, la natir la pa pran pityé pou zot : siklone par dsi siklone, tranblomann tèr zordi. Lo pov péi lé ankor plis atèr k’atèr, ankor plis dann fon k’le fon.
Mé souvan dé foi, karapat i monte déssi tété bèf mèg, bèf mal soigné. Mal soigné ? Oui, pars déssi la finisyon dizuityèm syèk, sa té in koloni rish, vèy pa koman. Mé kan bann zésklav la révolté, kan la kass z’ot shène épi kan zot la déklar azot lib épi lo péi indépandan... bann péi kolonyal la déside fé pèy azot pou an avoir gingn z’ot libèrté.
L’ané 1825, lo roi la Frans la déside obliz lo péi pèy in bèl bébète l’amann*... Toute bann péi kolonyal la tonm déssi li. Aprésa, li la konète la diktatir, l’okipasyon amérikène, koudéta par dsi koudéta… siklone ossi. Bann z’Étazini la karsèr lo péi**. Par dé foi la mète Titide prézidan, par dé foi la ranvèrs son pouvoir. Zordi, bann gran péi i vèrs z’ot gro pléré déssi Haïti, larm krokodil ! I promète si, i promète la. Promès soular, promès i tyinbo pa zamé.

NB
*150.000 francs en or, plis vin milyar dollar koméla.
**Bann z’Étazini la okip lo péi dépi 1918 ziska 1935.
***Jean Bertrand Aristide.

 Justin