Nana in télé i fé in roportaz sï le bout an ba madégaskar. Pou fé pitié, té fé pitié, bann gramoun, konm bann zanfan, lo zonm konm lo fanm. Solman zot i fé lo fime moi d’zanvié, i pass dann télé moi d’avril. Zordi, la pli la tonbé, mi éspèr lé in pti guine myé !

Tout suit demoun, dann radio la mèt a pléré épi la mèt a kritiké. Lé ga, si bann La Frans épi nou minm* lavé pa parti mèt dézord la ba, kolonializ lo péi plito k’lès ali tourn son kari par li minm, pétèt noré pa été konmsa koméla ?
Dizon, sak lé fini lé fini - tro tar pou lévé kan ou la fine pis o li ! - solman i pé réparé. I fo pa gouvèrman i oubli.

Koman réparé ? La pa an mètan ajnou sï grin filao konm inn-dé i fé ! La pa kan i anil la dèt, akoz sa i donn solman in nouvo dépar pou lésploitasion. Solman oir kosa zot la bézoin zordi : sak banna la bézoin sé pou èd azot pran lo trin dévlopman dirab. Apré, zot la pa pli bèt ke nou, zot minm va trouv moiyin pou tir azot dann malizé.
Alor, larm krokodil, la pa bézoin lès koulé. In vré l’èd sé sa i fo azot.

Justin

*La Réunion, colonie colonisatrice !!!!