Pti lékol i larg troi z’èr éd mi. La fiy mon komèr lé tro bonèr konm tou lé zour. La pèr ariv an rotar ! Alors èl i kalkil in bon manièr pou atann lèr bann marmay i sort : èl v’alé la farmasi pou pran médikaman doktèr la mark sü lordonans... Èt malad sa lapa in nafèr demoun i èm, épi médikaman, sé pou guéri biensir, mé sé pou gate lo kor galman déssèrtènn foi.

Rozman list-la lé in pé kourt épi doktèr lavé bien di : « Inkièt pa ! Médikaman-la lé bien ranboursé sa ! ». Kart vèr, kart mitièl, lo tantine i sèrv aèl : rozman, èl i di dann sonkèr, son mari lé adéré la mitièl. Lo madam la farmasi i di : « madam ou doi dé éro ! »

- Akoz don ? Tout médikaman lé ranboursé !

- Oui mé i fo kont avèk lo franshiz.
I gard dann porte-moné : in gro piès, sa i fé dé, avèk an plis inn-dé pti piès kuiv rouz i gingn pa arien avèk.. Kling ! Lo gro piès lé parti ! Napi arien éstèr, arien, arien... In parol i sort pi dann son gorz séré, zis son zié in pé mouyé pou larzan gouté son pti fiy dann tiroir-kès la farmasi.

Justin