Moin lé sir zot i koné provèrb i di konmsa : larzan i fé pa lo bonèr, mé li ède bien. Mé la pa pars ou i di sa toultan ké li lé vré san pour san. La prèv : an parmi tout demoun i splenn dann radyo néna demoun o-flan, néna demoun néna in pti moiyin, mèm in bon moiyin. Pars lo bonèr, sanm pou moin, la pa in késtyon bien matèryèl sinploman. Mi pans sé galman lo manyèr ou i oi lé shoz épi ou i pran lé shoz. Manyèr ou i pran la vi sinploman. Si ou sé in maloki, lo bonèr la li lé pa pou vni kongn dsi out port. Li pass o larj ! In késtyon : larzan li ède, li ède pa trap lo bonèr ? Pou moin, dann mon mantalité zordi, bonèr avèk larzan i marsh pa forséman inn avèk l’ot. Mé mi di sa konm mi san. Dann pasé pétète moin té i pans pa konmsa é domin, domin sora in n’ot zour. Alé ! Mi kite azot kass z’ot koko la dsi é ni artrouv pli d’van. Sipétadyé !