Oté

« Larzan i fé vativien : zordi li lé la, domin li lé fine sové »

In kozman pou la rout

Justin / 21 désanm 2018

JPEG - 43.6 ko

Di pa moin zot i koné pa kozman-la. Si zot i koné pa li tèlkesé, zot la fine fé léspèryans sète afèr la... Konbien foi zot i aprann in moun zot la koni ali kan li té plin o zas, dizon la fini par tonm dsi la paye. Kisoi pars li té dépansyé ! Kisoi pars demoun la fé pran ali makaroni pou la bouzi ! Kisoi pars li gingn pa dir non. Final de kont an parmi l’moun néna sak i koné dir non é pi néna sak i koné pa. Zot i pans pa konm moin zot ? Aprésa néna la féblèss l’amour : antansyon sa ! Néna poin arien i boush out zyé konmsa... Mi vé pa dir azot pass z’ot tan pou vèye z’ot mago si zot néna inn mé i fo zot i kalkil in n’afèr : kékshoz i i goumant pa, li tass, é afors tassé li diminyé é momandoné kan ou i rode ali li lé parti. Loumaye mi di azot ! Vèye ou mèm, pars i aprann pal o shien manj la grèss ! Moin lé sir in pé la tilté la. Alé ! mi lèss azot rofléshi la dsi é ni artrouv pli d’van. Sipétadyé !