Oté

« Larzan lé konm la plime dann né, si rash bonpé i fé mal, si rash in pti pé i fé mal galman »

In kozman pou la rout

Justin / 24 févrié 2020

JPEG - 43.6 ko

Médam, Mésyé, La sosyété koz èk moin sé koz èk in kouyon, mé sé o pyé d’lo mir k’i oi lo mason. Mi pans zot i koné konm moin kozman-la. An touléka, zot i koné doulèr pèrd larzan : pèrd la pa parèye doné : kan ou i done ou i koné avèk kisa la parti, ou i koné kosa la fé avèk donk out kèr lé klèr. Mé si ou i pèrd traka i mont dsi ou : kosa moin la fé avèk sa ? kèl koté moin la mète ? Kèl filou la pass inn min dann mon posh ? Sa i tourn, sa i tourn an boukl dann out tète é i fo lo tan pou fé out dèye-fasonn parlé. Avèye in moun la pèrd in moné é sirésèrtin ou va konprann ali myé : son fristrasyon, son difikilté pou klass san suite, son sispisyon par raport lo moun zalantour. Mi diré pa zot : vol zot fyansé é zot va konprann ali myé, mé o fon mi pans lé in pé vré. Alé ! Mi kite azot rofléshi la dsi é ni artrouv pli d’van. Sipétadyé.