Médame, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo bon masson. Mézami, mi koné pa dann kèl péi demoune la invante kozman-la, mé mi panss li lé vré partou, si tèlman larzan la pran in plass égjajéré dann nout sosyété. Kan i parl larzan, néna in pé i oi lo manke pou zote, mé zot i panss lé z’ote lé konm i di plin-o-zass. La vi lé konmsa : dis éro dann mon parte-moné, mi oi li pti mèm, dis éro mon voizin sé in ta larzan. An touléka sak lé vré sé ké pran larzan lé fassil é mèm pa doulouré, pèye in dète wi doi sé in rash kèr. La pa arienk koméla sa la komanssé, vi k’mon gran-mère Berthe téi di déza, an parlan d’son mari, dann tan èl é li té ankor koté par issi d’la vi : « I manke ali toultan in pti katsou pou fé in fran. ». Alé ! Mi kite azot rofléshi la dsi. An atandan trouv in manyèr moins doulouré pou rash zote plime de né épi pou pèye zot dète bien sir. Ni artrouv pli d’van, sipétadyé.