Niyaz kontaminé la pa pass la doine !
Kan la katastrof Tchernobyl l’arivé, nana déza in bon koup de tan, gouvèrnman fransé l’avé pa pran prékosyon, pars d’apré sak li té i di, niyaz radio-actif i sava pa travèrs la frontyèr. Donk lété mèm pa nésésèr distribyé bann pastiy l’iode. Ni koné kosa l’arivé ! Niyaz la pa pass la doine é aprésa nana d’moun la boir d’lé kontaminé, la manz léguime in pé danzéré.

I zoué pa avèk bann sib-prime !
Kan déga la bank l’arivé, la ministrèz lékonomi la déklar bann bank la Frane la pa zoué avèk bann produi bankèr kontaminé, la pa zoué avèk bann sib-prime. Bien bon ! Mé dan la somènn ki suiv, gouvèrnamn la trouv larzan pou prète in bank i apèl Natixis pou pa i pran le fon, définitivman. Aprésa, bout par bout, bann bank la France la mank dégréné épi la trouv ankor larzan par milyar a anprété.

La France ménasé ?
Zordi, la Grèce i dégrès, l’Irlande i manz ranpang, Portigal i dékal, é toute sa-la i anprète larzan pou pa pran lo fon. Pou pran larzan déssi kisa ? Déssi bann préstasyon sosyal, gouvèrnman l’apré raz la pinte ; É la France ? Pa d’problèm… inkyète pa… toute i sava konm k’i fo. Sof ké, in gran zournal ékonomik i di, la France lé ménasé. El na mèm maladi ké lé z’ot, mé lé pankor ariv mèm dégré d’grav.

Larzan i mank ? Zamé, larzan nana. La mète par koté 745 milyar pou dépane bann bank. Donk, larzan nana sa ! Mé litilizasyon nana a rodir ! Sa i klosh pa !

Justin

NB : ranpang = la kroute de ri.