Lané 1959, fédérasyon kominis La Rényon i transform an Parti Kominis Rényoné. Bann zansyin i rakont sa la pa éspas konm in lète a la post. Pou kosa ? Pars lété in vré révolisyon.

Bann dirizan lavé dmann La Rényon départman fransé é, fors-a-fors, bann dépité lavé fini par transform la Gwadloup, la Gwiyane, la Martinik é La Rényon an départman loutre-mèr : ni koné, sa sé la loi 19 mars 1946, in date i kont konm 20 désanm 1848.

Pou kosa lo kongré 1959 la déside sa ? Pars la loi départman fransé lété konm an pane. Lavé di nou té sava gingn légalité sosyal lo promyé zanvyé 1947, mé lé shoz té i spas pa konm i falé : la koloni té i kontinyé son rout san shanjé : gro blan lavé konfisk départman fransé.

Démoun té i rèst mizèr, sof lo pti trépé la gingn pran lasansèr sosyal. Lo smig té faye, bann z’alokasyon té pa égal, la kaz té an dégréné, silone té i bate bann kaz atèr : siklone 48 la mèm tyé 166 pèrsone. Azout èk sa la frode dann zéléksyon, la violans kont bann travayèr. Kas-an-fèr partou dann shomin…

Alor, la mazorité dann kongré la déside domann lotonomi pou kontinyé la lite pou défann bann travayèr épi galman pou fé rokonète nout droi d’ Rénioné.

Justin