Mon bann dalon, ala in proverb moin la lir kékpar é pou dir azot la vérité moin lé bien trakasé moin mèm pou tir in bon léson, in bone manyèr pou prépar nout domin. Lé vré, an parmi nou, néna in bonpé i koné pa sifizaman nout pasé. La pa nou lotèr pars zot i koné konm moin listoir, la n’ot épi sète l’imanité, lé pa bien amontré dann lékol nout tout la parti, épi dann lékol nout zanfan i sava zordi... Mé a bien kalkilé, listoir i pé done anou désèrtènn klé pou règ bann problèm nou noré pou réglé domin mé pa tout. Pou kosa ? Pars i pé ariv désèrtènn shoz lé si tèlman nouvo ké listoir i pé pa dir anou koman ni pé ansort anou pou vréman. Si ni anparl La késtyonn rokin, ni oi bien bann pouvoir piblik i tatone, i tatone san trouv in bon solisyon. Pou kosa ? Pétète pars sak la fé yèr lé pa bon pou zordi é sirtou pou domin. Dérègloman klimatik ? Sa lé nouvo galman é bann solisyon yèr i konvien pétète pa pou domin. Mi invite azot pou rofléshi nout provèrb zordi. Mé o fon zot i koné bien konm moin mèm in provèrb lé fé pou gide anou in pé mé li pé pa done anou in solisyon san pour san valab. Alé ! Mi kité azot rofléshi la dsi é ni artrouv pli d’van. Sipétadyé !

Nb. Zot i koné kozman-la, i di konmsa, « listoir i répète zamé é kan ni kroi li répète, li bégèye sinploman. »