Nana demoun i oi pa pli loin k’lo bout zot né dann tout zafèr zot i antrëpran. Pou zot, tout lé sinp, zot i fé près sak zot i vë, na dé foi sak zot i gingn. Solman, kan dëmin i ariv in dézagéman zot la pa kalkilé par avans, astèr-la zot i pèrd l’èr.

Kan ou amènn out zafèr pèrsonèl, traka lé rienk pou ou, solman kan ou amène zafèr in péi, zafèr in réjion, la pa parèy ditou. Sak ou la désid fèr, i mèt tout demoun dann malizé. Konbien légzanp komsa nou la konèt : alon rapèl la rout an kornish, sa in lérèr la fé depï la komansé mèm.

Zot i souvien, zis avan siklone sèt ané, lo mèr Sinni la domann in lantropriz pou mézir profondèr la mèr. La mèt in bèl bébèt platform koté barashoi : la mèr la kas lo zafèr an moin d’tan ki fo pou dir.

An kontrèr, nana d’ot zafèr lé bien améné : lë plan pou l’otonomi dann lénèji, lo tram-trin, épi d’ot zafèr ankor. Bien sir, la pa ninport kèl zoizo lé k’ab fé zafèr konmsa, konm ki fo. Konm noré di in kozman :
"Lavnir sé sak lé pli malizé dann prézan*." Sa lé vré pou vréman !

* « L’avenir c’est ce qu’il y a de pire dans le présent », Gustave Flaubert.

Justin