Moin la bien ékout lo diskour J.M. Ayrault. L’avé dé shoz intérésan, mé l’avé galman dé shoz i fé pa plézir. Mé lé tro long pou dékortik sa ; in zour va vni l’èr agard ali plis a-fon. An atandan, mi romark sète dépité La Rényon dsi sète la vote la konfyans. Donk zot i fé konfyans san-pour-san lo nouvo gouvèrnman sosyalis. L’èr k’i lé, moin la pankor ékout tout lo sobatkoz, mé mi pans bout par bout m’a ékout ali. Kansréti pou savoir èk kèl sos i sa manj anou.

Moin la antann inn dir, li la vote la konfyans pars Promyé minis la di, pou l’Outre-mèr, li va favoriz l’anploi, la jénès épi la formasyon. Koman va fé ? Sa mi koné pa, mé na plizyèr fason fèr. Lé posib done anou travay an sold konm bann CES. Lé posib i déside done Kréol travay, mé i komans mal vi k’nana kèk santène amontrèr i sava zistoman pran nout travay moi d’séktanm. Mi pas azot lo bann moun v’ariv èk kisoi zot mari, kisoi zot madam, kisoi zot paksèr ou sinonsa zot paksèz, sansa ankor sinploman èk zot kas-kroute. Bon ! Lé tro bonèr pou zizé, mé moin nora pétète pran prékosyon avan pèz dsi bouton “oui”, si moin lété la plas bann dépité.

Lo pli vré, sé ké mi sousyé pou sak i fé pou La Rényon, pou la Frans an zénéral, mi dir ar pa sa i pas dsi moin konm lo dsi plime kanar, mé lé près in pé konmsa. Lo pli vré, sé ké moin té i kroi in pé Père Noèl, moin té i pans té i sava koup lo pon avèk la lozik kapitalis, alé oir la pa sa. Mi koné té i falé pa atann in n’afèr konmsa, mé kan la di lo shanjman, dann fon mon kèr, moin té i pans in vré shanjman. Lé bète, mé lé konmsa !

 Justin