Bann moush-a-mièl, in pé partou déssi la Tèr, la gingn in drol maladi, in maladi mortèl, vi k’zot i mor par milyon é i prétan k’i trouv pa in bon médikaman pou soign azot. In pé i di sé pa la maladi k’i tyé azot mé bann z’insèktisid.
La défandi fane "le régent" épi " le gaucho", dé linséktisid danzéré pou bann moush-a-myèl, mé i kontinyé tiliz "le kruizèr" ; in n’afèr danzéré, d’apré sak i di ; in salopri, solon bann élvèr z’abèy. Mi domann amoin kansa in pé va vni rézonab. Nana pou diskité, mé diskité i guéri pa.

In pé va di sa lé pa grav, mé in savan konm Einstein la di konmsa : « Kan moush-a-myèl va disparète, va rèss solman katran pou l’om viv ! ». Donkalor, lé normal in pé d’moun i inkyète épi i rod in manyèr pou sov so zanimo byin itil.
Nana in pé i déside soign lo moush dann in milyé lé pa polué épi, d’apré sak zot i di, li artrouv son vitalité... An parmi sak i fé sa, nana Konsèy rézyonal Langdoc-Roussillon, la déside mète in bann rush déssi son toi : i marsh byin épi i done bon myèl.

Mi sort lir dann in zournal, i nonm "La Marseillaise", la vil Monpélyé i sort déside élèv moush-a-myèl, pa déssi son toi, mé déssi in térin la komine.
Banna lé fou ? Non va ! Lé byin k’in komine sansa in Konsèy rézyonal i done légzanp, dann in ka konmsa, konm dan d’ot ka, k’i intérèss lo dévlopman dirab.

Justin