Dimansh o swar mwin ta po argard in lémisyon d’si in shinn satélit, in lémésyon d’si la politik konm sovan-dé-fwa. Tou lé dimansh néna in moun politik i vyin, kiswa pou donn son lavi, kiswa pou fé in komantèr d’si laktialité. Lo swar la lo prézidan la rézyon Nor-pas-d’calais té la. I pass an rovi laktialité é in mandoné la zounaliss i poz a li in késtyon d’si lo nouvo kod di travay, kosa li an panss é si li té parlmantèr si li noré vot lo tèks konm i lé ?

Rozman mwin té asiz, sinon si mwin té dobout, mwin noré tonm d’si l’ki. Li la réponn li noré voté mé an minm tan li noré domandé ki modifié lo tèks vik li trouv lo tèks in pé an dézékilib. Donkalor la zournaliss i domann a li pou kosa li di sa ? Li réponn anndan néna tro pou lo patron, na pwin aryin pou lo travayèr. An dé trwa fwa li la répèt lo minm nafèr “néna tro pou lo patron, i mank la sékirité pou travayèr“.

Pou sak i koné, i pé pa di sa in moun la gosh, in tan li té miniss Sarkozy. Aprésa, mwin minm, mwin la argard in pé pli pré lo tèks pou war kosa néna dodan ? L’èr la mi konpran mié pou kosa bann sindika lé krintiv. Zis pou konprann, i prétan dir èk sa, minm si lantropriz i gingn in takon larzan, in matin, lo patron i révèy d’si mové pié li pé fout déor in travayèr kèksoswa. Banna, si la drwat i trouv son kontantman, lé byin rogrétan di, i pé pa èt bon pou nou !