Dopi lontan zot té po atann lo désizion lo CIOM (comité interministériel des Outre-Mer) pou nout péï. Lo zafèr la fini par réini mardi 18 jilié pou donn son réfleksion.

La donn in catalog prozé ké, pou dessertin, y sa va ziska 2027 pou in laplikasion définitif. Oté ben déza en 2027 gouvernan la sra si lo poin d’dépar sa. Li konte pétèt dessi son suivan pou aplik son désizion, ben kont touzour, Dizon la fini fé ! Sa la pa in foutan sa pito ?

Dézièm romark sé déssi lo takon lanonse. Dann tou sa proposzison la mi wa pa kossa nana pou sov kréol. Y en parle la vi chèr mé mi wa pa, dann toussa, kel solision nana vréman. A wi, pèy biyé lavion pou marmaye, sa lé bon pou bande kompani lavion (Air France, French Be, Corsair,…) mé la plipar sé pa kréol y travaye ladan. Sa lé in sèl lexanpe dessi tant dote.

Parle pi l’octroi d’mer ; i di i sa réformé parse ké sé sa y fé la vi sèr. Moin mi di pito, zot va réformé dé manièr na ankor plis bato la Franse i gingn akoss dann por La Rénion, ek produi l’indistri fransé. Nora pi d’barièr po zot. Kréol va kroul dossou la marsandiz la Frans, mé li Nora poin travaye mêm ! Li sra zis pou asté produi déors mêm. Ziska la nèze va fé asté a nou, téléman ke sra bon marsé. Nou sra zis bon pou inporté mêm.

Mézamis mi pé kontinié konm sa ek lo 72 propozission, mé à dir la vérité, sé pa sa nou vé. Nou la pa bézoin bann fanm ek boug politik fransé i di a nou kossa y fo po nou. Dabor, zot y koné mêm pa dan kel losséan nou lé sitié, é la zot va di à nou kossa y fo nou manz, kossa lé méyèr pou nou ?

Arèt ek sa don ! Nou pé pi siport sa. Nou vé déssid par nou-mêm kossa lé bon pou nou, ala lo sèl zafèr lé korek, lo sèl zafèr lé aceptab, lo sèl zafer nou vé.

Ni artrouv pli dvan.

Justin