Mézami, mi sort sèye ékout lo bann koko fromaz la proféktir apré fé zot konférans do prèss milti-tète. Momandoné, moin la romark moin téi antann in roulmann voi dann mon tète, mayé ansanm avèk mon zakoufène, mé késtyonn konprann-zéro kalbass la fimé grandoi.

Zot va dir amoin lé pa nésésèr i konpran aou pou kozé, mé kan ou i vé i konpran aou, lé pli préférab sak l’apré akout aou, i pé konprann aou san difikilté. Dann konfor si ou i vé. Sa in késtyon lé inportan sanm pou moin !

Mon késtyon : kan bann médsin i koz dsi lo kovid , kan bann sèf blan i koz si tèl shoz sansa si tèl ot shoz, kan lo préfé i koz dsi bann mézir anti-kovid d’apré li, mi yèmré savoir si demoun i konpran sak i di. Kan ou i passs an mèm tan dann dé télé sé pars ou i vé fé konprann aou par la mazorité d’moun, ébin…

Si demoun i konpran pa ou i pass akoté out bi é moin néna dan mon idé dopi moi d’mars nou lé dann in ka konmsa. La plipar d’moun i antan k’i koz, mé zot i konpran pa. Sa i rapèl amoin, in zistoir mon papa la rakont amoin kan Gasparin la vn i fé son prédikasyon Sint Klotid, in madam téi apèl Katarina téi shant légliz épi apré lo gran rényon èl la di avèk lo Gasparin : sof kouk ti di, mé k’ti koz bien.

Zordi moin lé dann la sityasion Katarina é mi di lo bann madam épi lo bann mésyé : sof kouk zot i di, mé zot i koz bien é…mi konpran pa arien... La pa movèz volonté d’mon par ! La pa pars zot fransé gran lékol i fatig mon tété, mé lé konmsa mi konporan pa é si garson Féliks i konpran pa, néna la moityé La Rényon, o moins, i konpran pa.

Mi di pa sa pou fé arète azot kozé, é zot i pé kontinyé si zot i vé ziska la Sin Glinglin, mé lé dir, lé dir oui, ékout in n’afèr kan ou i konpran pa… Poz lo késtyon sé réponn é mon répons lé sinp : koz tèl fason ni konpran ! Pèye in ga pou traduir si zot i vé mé fé kékshoz. Lang dé sign lé v alab, mé sa osi mi konpran pa vi k’moin lé pa instruyé ladan.