In koté, nana la droite, sak lé dann l’IMP, la kit in tour, la bril la paye konm i di, épi la rékonsilié apré. Inn ot koté, nana la droite, sak i vé pi antann parl l’IMP : dizon i manzré pi in grinn sèl ansanm pars, konm in pé la di, sé issi k’i doi règ problèm La Rénion ; zot i apèl azot zot mèm Objectif Réunion. Ala dé bann gabié-kosto, ansien dalon, an shalèr inn avèk l’ot, rosor monté inn kont l’ot, la pa loin tir shomiz pou fou in kou !

Épi nana sak lé dé koté an mèm tan : lé dann l’IMP épi dann Objectif Réunion. Nana mèm inn lé gran diréktèr dann Objectif Réunio, épi, a s’ki paré, dirizan dann l’IMP. A bon ? Lé possib in n’afèr konmsa ?
Sansa li la pankor radié son bail in koté, é li la pran nouvo kaz in n’ot koté ? Lé konpliké in n’afèr konmsa ! Asiz rant dé shèz la pa bon pou la santé !

Bononm-la i apèl Didier Robert, mèr Tampon. Sé li k’lé dann so ka-la. Sré t’i pa in fèy vakoa ? Sré t’i pa in moun i oz épi i krin an mèm tan ? Sansa in moun k’i konpran fir-a-mézir viv an Rénioné, kalkil an Rénioné, vanj an Rénioné lé pa si fasil ké sa. Pars kan ou lé asisté-la, mèm asisté dé liks, ou i pé pa s’anpas bann kolonial nana in bon konsidérasion pou ou.

Justin