Médam zé mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo mason. Mézami, kozman zordi mi tir sa dann in péi i apèl Sénégal késtyonn kontinyé fé lo tour l’afrik an provèrb. Tazantan dé sèrtin moun i vol in mizik : na poin lontan dann Sénégal mèm i n moun la vol in kora é ziska zordi la pankor trouvé é moin é sir é sèrtin lo volèr la pa gingn tir in zoli mizik dsi lo linstriman-la. Konmsi in moun i sava vol kayanm Daniel Waro épi li kroi li sa tir in bon maloya la dsi. Malorozman la pa konmsa ké lé shoz i marsh : in linstriman sé in l’instriman é l’ar lo mizisien, sa i vol pa sa. Alor, si l’anvi i pran azot vol in mizik demoun, alé dabor aprann zoué. Alé pass dé zané é dé zané dosi in l’instriman é dsi in partisyon, aprésa pétète zot va gingn zoué. Ankor, gingn zoué sé métriz in téknik, mé métriz l’ar, la pa toulmoun i gingn. Alé ! mi kite azot roflésjhi la dsi é ni artrouv pli d’van. Sipétadyé.