Mi souètré in n’afèr, mi yèmré toute demoune do pré konm de loin i rovandik la patèrnité politik nout parti, ébin zot i pran liv-la, zot i étidyé épi zot i rann azot kont par zot mèm la rishèss lo bann zidé épi zot fors konm zoutiye pou transform la réalité par l’akssion.

Mézami, pou sak la pankor lir bann zékri nout kamarad, i fo zot i pran an kont lo va-é-vien rant lo bann zidé épi l’akssion épi viss-vèrsa… Mi panss mwin la fine anparl azot in gran rényoné la viv dann diznévyèm syèk é li téi apèl Nicole Robinet de La Serve (1791- 1842) é li ossi, dann tout son l’akssion piblik, li la touzour fé lo bann z’alé rotour obligatoir rante la téori épi la pratik-la panssé épi l’akssion-akoz pa rant lo rèv épi l’akssion, in kozman i sava bien avèk la personnalité Paul Vergès..

Astèr si zot i pèrmète amwin dir in n’afèr : zot i koné koméla nout parti kominiss rényoné néna problèm é nout problèm pé s’fèr li lé né fote d’inn bone konéssans bann zidé épi bann shantyé nout parti épi son bann kréatèr la mète an plass an suivan la métode mi apèl : « in bon gaturaz rant la téori épi la pratik. » avèk l’amour nout péi épi lo sanss lintéré zénéral.

Pou mwin si bann zidé lé just mé i fo ni méfyé bann zidé mantèr, épi si i mète azot an aplikassion korèktoman, lo rest sé in n’afèr d’tan, in n’afèr d’volonté, in késtyonn sakrifiss, épi la kapassité pou rézisté san konté in bon rolassion avèk lo pèp dann lakssion révolissyonèr.

Aprésa ni pé dir lé fine tar, lé mèm bien tar, mé la pa tro tar. Alon étidyé liv mi sorte an parlé é prann ali konm in guide ékléré dan la lite ni doi améné.

A bon antandèr salu !

Justin

NB Brigitte Croisier(1946-2020) la fine pass l’ote koté d’la vi. Son liv la parète dann l’océan éditions.