I paré dann tout péi, bann kok nana zot fason shanté, zot fason kozé. Mi ansouvien pars moin la lir sa dann in revu kulturel rénioné téi apèl “Fangok”... « Kikiriki ! », sa shanté bann kok zalman. « Ton papa kok, ton momon poul ! », sa shanté inn-dé kok La Rénion. « Kok doogle dou ! », sa shanté bann kok langlétèr. Bann kok la Frans i fé « kokoriko ! »

La pa pli loin k’dé troi zour, bann kok la Frans la shanté par la boush madam Lagarde, ministre lékonomi dann gouvèrnman. Pou kossa ? Pars solon madam-la, la Frans, sé lo sèl gran péi la pa rant an réséssion : La plipar bann péi la pran le fon : Lalmagn li ! Léspagn li ! Langlétèr li !... mèm Zapon la gingn lo kou.

Kokoriko ! Kokoriko ! Kokoriko !

Dann la Frans, la prodiksion la goumanté. Pa in bonpé, pa in ta èk in paké, zis 0,19%, mé kant mèm, sa lé mié k’zéro, sa lé mié k’“moins kékshoz”. Madam Lagarde i di, sa in bon sirpriz ! Èl té i atann pa in bon rézilta konmsa... Sof ké, solon l’Insee, shif-la lé pa sinifikatif : i pé ète sa, konm moins, pétète in pti grin an plis. Touléka, sa i vé dir la Kriz lé bien la.

Na in komik téi apèl Coluche té i di konmsa : Si la Frans la shoizi le kok pou bien roprézant aèl, sé pars sé lo sèl zanimo i gingn shanté, son dé pié dann sak zot i koné. Na dé kou, sa lé vré !

Justin