I pé dir sa d’in moun la promète aou in n’afèr, sansa i doi aou kékshoz. Sé l’èr kan ou i rod ali, ou i trouv pi li ditou. Sa i pé z’ète vré dann in bonpé ka ké mi lès aot pou maziné mé zot i koné na d’moun na poin réspé pou la parol doné. Mé ousa i sort so kozman-la ? Dabor, i paré ké krapo sa i fé pa tro lontan ni koné sa La Rényon. Moin la tandi dir la fé vni bann bébète-la, fi-t’in tan pou manz borèr dann kane. Mi pans pa li la tro sèrvi pou sa, mi pans li la plito préfèr okip konm li téi vé l’éspas. Astèr lé vré in sézon nana krapo, in sézon zot i disparète é kan zot i disparète i parétré zot i antèr an atandan in tan méyèr pou zot. L’èrla z’ot kardyak i ralanti, é zot i dépans près-pa ditou l’énèrzi si zot la pran prékosyon pou amas la grès. Alé ! Mi éstop la pou l’instan é ni artrouv pli d’van sipétadyé.