Oté

« Lé myé fèrm son také épi pran lo risk pass pou in kouyon, plito ké rouv ali épi aport la prèv son kouyonis puisans bonpé »

In kozman pou la rout

Justin / 7 zwin 2019

JPEG - 43.6 ko

Mésyé médam la sosyété, tout demoun i koné pa tout zafèr dsi tout, donk tout demoun néna son zone la kouyonis é pou désèrtin zone-la lé pli gran ké pou d’ot. I di pa : tyé kouyon pou prann son plas ? I di pa galman : trap dsi son vant la born la kouyonis épi déplas ali pou grandi son domène ? Sa lé vré pou vréman é ni vé ni vé pa mé lé konmsa. Néna mèm in pé i pans oplis zot lé azé oplis zot néna la vérité tou kui. D’ot i mazine vi ké zot néna la monant an kantité zot néna bonpé dann koko. Néna sak i pans si zot néna in plas inportan dann la sosyété zot lé bien plasé pou konète bonpé zafèr. Poitan ni pé di, shakinn i koné in pé épa tout é nout konésans i shanj avèk lo tan épi lo travaye demoun i fé dsi tèl osinonsa tèl sizé. Donk lé nésésèr tazantan rovoir out bann konésans é si lé vré ké ou i gingn ar pa pou vréman, out mérite sé ké ou la éséyé. Alé ! Mi kite azot rofléshi la dsi é ni artrouv pli d’van. Sipétadyé !