Dann son kanpagn élèktoral, lo prézidan Lamérik, Barack Obama, la fé in bon pé promès. Sa lé normal dann in zéléksyon ! Sa té i falé ossi, vi k’ prézidan Bush té i amèn Lamérik an sharète shaviré…

An parmi, li la promète fèrm la prizon Guantanamo, akoz la-ba lavé in kantité dmoun té an prizon, soi-dizan pars zot té in bann téroris épi zot té i fé la guèr dann Lafghanistan. Solman zot té i pass zamé an prosé, vi k’le prosé, bann dirizan amérikin té i romète sa pou la Sin-glin-glin.
Obama la gingn la plas prézidan : té lèr pou réspèk son promès, tout son promès ! Lé vré, li la déside fèrm lo prizon Guantanamo. Lé byin !

Sof ké li la pran troi drol désizyon, inn-déyèr l’ot : inn, li la désid la zistis i fèr ar pa aryin bann moun la tortir bann prizonyé ; dé, li la défann mète bann foto demoun tortiré dann zournal ; troi, li la pa fèrm bann tribinal militèr i ziz bann prizonyé...
Lé vré, la di galman i tyinbo ar pa kont bann prèv, si la gingn sa par la tortir bann prizonyé ; mé sa i fo oir pli loin !

San zour solman li lé prézidan, é ala, konm di lo kont, li komans trok parol.
Moin mi trouv sa lé pa ankourazan ditou pou la suite…

Justin