Sèt ané nana katrovin jèn la désid alé dann péi déor pou an avoir in bon formasion dann bann métié la kultur. Sa sé in bon nouvèl ! Sa i amontr banna i pans la kultur, sa in n’afèr inportan pou nout péi, pou son zordi konm pou son domin. Par l’pasé, nana déza mil jèn la fine bénéfisié so formasion-la : sé dir si sa i kont po bann jèn rénioné.

Solman, ala k’gouvèrnman - sansa son roprézantan - la déside koup larzan pou sak i sava fé bann formasion kiltirèl, akoz, solon li, i gingn pa travay sanm sa... Domann pa si, pou di sa, gouvèrnman la fine bien étidié la késtionn l’anploi. Non, zot i di, in poin sé tou, san pran la pèn rann azot bien kont ! Zot i pran pa prékosion non pli, pou sèy oir si nora, ou bien nora poin, boulo pou bann diplomé dann séktèr-la !

La poin pou diskité ! Sé komsa é pa otroman. Épi nou, bann z’indizèn, i fo ni pran z’ot parol pou larzan kontan, i fo ni fèrm nout bèk. Parol blan, sa parol l’évanzil !

Assé fé pran anou makaroni pou la bouzi, po d’shanm pou pla kouvèr. Konm i di souvan, nou la pa tié kouyon pou pran la plas : sak mi kroi, sé k’zot i vé kass nout politik formasion, kass nout program pou la zénès. La pa arienk in késtionn larzan sa ! Sirman pa in késtionn l’anploi non pli !

 Justin