In dalon la anvoy pou moin in pétision pou signé pars d’apré sak i di, gouvèrnman i vé modifié lékol matèrnèl épi diminié son rol dann lédikasion bann marmay. Mi sava sign pétision-la pars apré, kan le kou sar fine parti, sar tro tar. Mé, mi doi dir, moin té i krin in n’afèr konmsa dépi k’méssié minis lédikasion nasional la di : « La pa bézoin in amontrèr nana Bak plis sink pou shanj koush bann zanfan ! » vi k’toulmoun i koné dann lékol matèrnèl marmay i mète pa koush.

Oui, toulmoun i koné ! Sof le minis ! Zot i kroi sa zot ?
Pou moin, dann son tèt déza, li lavé lintansion ranplas lékol matèrnèl par in léspès jardin zanfan. Sé pou sa li té i done konm in son ! Donkalor té pa li linbésil, lété tout sak té i kroi li koné pa kossa i lé in lékol matèrnèl avèk bann zamontrèr konm ni koné, bann tati konm nana koméla, épi bann program, épi laprantisaz la vi an parmi inn sosiété.

Bin, pou sak i vé in vré lékol matèrnèl pou zot zanfan, koman va fé ?
Lé pa konpliké, va fé lékol matèrnèl péyante, épi sak nana in bon moné, zot va gingn péyé. Mèm si zot pla lé bien gonflé, zot va pran in “neurs”* shé zot, konmsa zot zanfan va bien progréssé. Dann tan-lontan, té konmsa té i fé !
Bin, bann zanfan ti-kolon ! Koman va fé ? Va fé konm k’i gingn : in pé la garderi, in pé lo zé, in pé mèm va niabou rès zot kaz... épi si i fo, zot v’alé ti lékol maron konm dann tan lontan. Lé pa bèl in n’afèr konmsa ?

* i ékri “nurse”, mé i di “neurs” an aranzan la boush konm déyèr volay.

Justin