Pou moin, in péi konm La Frans i doi donn, konm banna i di, in bon l’imaz dé li partou oussa li lé, dann toute téritoir li lé prézan. Vi k’La Rényon sé inn an parmi bann réjyon fransèz lé normal k’i fé lo méyèr possib pou k’ni prézante in bon figuir dann l’oséan indyin. Ni pé pa kontante anou dir, issi lé moin pir ké dann d’ot landroi... sa la pa assé, sa la pa sifizan pou nou,pou nout péi é pou La Frans galman.
Pars na dé shoz i klosh pa, dann nout sitiasyon, é dé shoz k’i gingn pa kashyété : tousa bann shomèr, tousa bann ilétré, bann i apèrsoi aryink érémi, la kaz k’i mank épi toute sort difikilté pou l’moun. L’èr-la, ni pé pa an avoir in bon l’imaz, é l’imaz La Frans lé pa non pli sak èl i pé souèté… mèm si dann déssèrtin z’afèr, nout zétoil i briy.
Si mi tronp pa, sé pou trouv bon solissyon, lo Prézidan la répiblik la déside fé in zéta-zénéro. Sak l’avé z’idé, la parti prézante son z’idé épi sak l’avé poin aryin pou propozé la pa propoz aryin. Sak la tète té sèk la rèss konm martin kikouzi. Dann ta l’avé lo Didier Robert..
Mé alé konprann pou kossa gouvèrnman la déside tyinbo lo rin lo démolissèr, lo boug na poin in sèl l’idé, in sèl projé konm sak lo prézidan la propozé… Alor, ni pé domandé si gouvèrnman i tyinbo kont l’imaz La Frans dann l’oséan indyin... Pou l’instan i fé pa l’èr : lé pa bon pou li,é lé mové pou nou.

 Justin