Si moin lété lo Prézidan la Répiblik é si moin l’avé parti l’izine Boi-Rouz, lo vin-té-in ’aout, ala kosa moin noré di dann mon kozman :

« Mésyé Téréos, ou na la shans travay dann in l’izine modèrn konmsa é pou vréman ou lé pa dann in l’izine yèr mé dann in l’izine zordi. Moin lé bien kontan pou ou ! Pou vréman moin lé bien kontan ! Mé mi di aou si d’in koté moin lé fyèr, l’ot koté moin na rogré.

Pou kosa moin lé kontan ? Pars l’izine lé bien modèrn é li tousèl li na moiyin moud tout kann dopi Sint-Roz ziska Sin-Dni. Anpliské sa son wapèr i sort akoté, dann in l’izine éléktrik i marsh in pèryod l’ané avèk la bagas... Moin lé kontan osi par raport lo pèrsonèl lé bokou kalifyé é bann plantèr la vnyabou adapté avèk in métod travay bien roganizé, san pèrd lo tan, an konésan bien lo bann zès zot i doi fé, épi koman lé shoz va s’pasé pou zot dsi la késtyonn rishès zot kann an sik. Donk la modèrnité lo lizine i ral amoin pou vréman.

Solman mi romark Téréos, ou la bénéfisyé tout travay lété fé avan ou é mi domann amoin bien si zot la pèy in droi intéléktyèl i mérit bann rényoné dsi sak la rodé épi la trouvé avan ou, kisoi dann laboratoir, kisoi dann shan bann plantèr, kisoi ankor dann tout sak bann partnèr la mète an plas dopi dann tan lontan. Vi koné bien mésyé Téréos ou la pa débark dann in dézèr téknik épi kiltirèl, é ou la fé in tré bon l’opérasyon kan ou la ashté l’izine bann rényoné.

Mi romark osi zot la pa tro fé avans lizaz tout bann produi dérivé nana dann kann par raport la lis sink san produi posib, solon sak in pé i di, ziska mil solon d’ot. Donk moin lé pa kontan oir aou apré zète la rishès bann rényoné kisoi bann produi i tir dann la bagas, kisoi bann produi i tir dann la mélas, sansa dann la vinas épi ankor dann fèy kann-sak tout demoun i koné é zot bann téréos i diré zot i koné pa, sansa zot i mépriz pars zot i koné sa i doizète in rovni an plis pou bann rényoné. Mésyé La Rényon lé tro maldévlopé pou zète son rishès par la port sansa par la fénète. Demoun i pansé, pétète, ou téi sar fé in bonpé d’shoz an toulé ka plis ké sak té avan ou, mémi doi dir aou moin la pa vi pliské sak moin la vi. Mi trouv ou lé nil dann lo dévlopman dirab... La pa for pou ou mésyé Téréos é mi tir pa ou mon shapo an tou lé ka. »

Justin

NB I paré Téréos la pa in moun mé in kopérativ ! I fé arien, bal i artourn pa dann sharjèr kan lo kou la fine parti. In mo pou la rout : "laspèrkui" ou sinonsa "léspèrkui". Pa for pou travay, for pou anprofité. Konm i di, in pikèr-dann zasyète avèk bien antandi in sans prop épi in sans figiré. Mi lès azot kass zot koko la dsi pou trouv koman i aplik sa. Na lo tan pou trouvé dsi la rout an fézan z’ot shomin fézan, lo tan zot i rant zot shé soi.