Somènn dèrnyèr, lavé in marsh blansh pou Patricia, in bon zanfann moun, in bononm la tyé afors le kou. Yèr matin, radyo i anons in bononm la tap son madanm é pa aryink in pti pé.
Movèz nouvèl i mank pa… ! Maladi-la i komans ète in pé tro kouran dann nout sosyété. Poitan, i pé di k’i fé pa kèkshoz pou soign sa.

Byin antandi, bann éspésyalis léstatistik i travay la-dsi. Bann sosyolog, doktèr la sosyété, i aport in pé zésplikasyon. Bann psikolog i oi la késtyon suivan lo bann métod zot i aplik dann z’ot métyé. Zot i fé sondaz i donn de koi myé konprann lo zafèr. Bann ziz i kondane désèrtènn pèrsone pou suiv in réédikasyon. Bann médsin nanna pou fèr. Bann prèt tout rolizyon i lans mésaz pou la konsyans demoun. Bann politik valab i rès pa bra kroizé. Bann militan i fé sak zot i gingn...

Tousala lé bon, i fo pa zété, mé maladi-la lé fine si tèlman grav k’i fo tout i mète ansanm pou fé rokil aèl, i fo konm in mobilizasyon zénéral. Lé irzan, pars in sosyété ousa in pé bann madam lé maltrété, sa lé pa in bon sosyété. In sosyété ousa in bon pé madam i ramas lo kou konmsa, lé pa in sosyété konm i fo anou ! Lé pa sa nou la bézoin !

Justin