I prétan dir nana in bonpé dmoun i frod déssi la késtionn larzann’lo : 58 million l’euro. Mé mi koné pa si i fo bate tanbour déssi in n’afèr konmsa, konm i bate !
Biensir, ni pé dir la pa bien, d’fé in tik-tak pou gingn larzan la pa ou. La pa ou, la pa ou, in poin sé tou ! Ni pé dir ossi, si in moun i vol larzann lo, li lé riskab vol in pé tout zafèr. Ki vol in zèf, lé riskab vol in bèf !
Mé, mi koné kant mèm, in pé i doi ri dan z’ot barb kan zot i antan in n’afèr konmsa. Kissa ? É bin, kisoi bann patron i gaspiy larzan z’ot sosiété épi i gingn parashit an l’or ; kisoi, bann mèr, in pé la pran larzan bann santr kominal laksion sosial, pou ashté zéléktèr ; kisoi bann moun nana lo pourkoi, épi i oubli in zéro dann z’ot déklarasion z’inpo, olié mète mil i mète san. Épi, bann moun la désid pa pèy l’inpo an Frans pou alé pèy dan la Suis, Monaco... Domaz i bate pa tanbour déssi in n’afèr konmsa !
Park sa, bann volèr larzann lo, sa nana biensir, mé nana si tèlman dmoun fran ! Mi sar pa di bann volèr lé rar konm korn lapin, mé prèsk, é pou prèsk pa larzan. Fransh vérité !

Justin