Pou kossa mi di sa ? Mi di sa pars dopi plizyèr zour issi La Rényon i fé sho konm mwin la zamé koni mèm si mwin lé pa dsi la tèr dopi dé zour, mèm si konm in pé toute demoune mi koné kossa i lé la shalèr.

Dopi plizyèr zour mi arète pa domandé kossa l’ariv noute péi, pou kossa i fé sho konmsa : par plass néna ziska 35 dogré, é mèm dan lé-o termomète i trape lo trante dogré. Fransh vérité, sa sé kékshoz mi rapèl pi si mwin la fine konète sof dann péi déor-mé pa shé nou.

Biensir météo France i trouv lésplikassion k’i konvien avèk in sézon dé plui rotardé, avèk in loséan sirchofé, in l’èr sèk vèye pa koman é wala la rossète d’in fésho konm nou la zamé konu — pétète in konsékanss lo boulvèrsman klimatik.

Siouplé, alon arète mal plézanté konmsa. Alon rodir ankor in kou lané skolèr lé mal étidyé par rapor noute klima. Dizon bann marmaye épi bann famiye, konm bann pèrsonèl, i konte pou la po patate dann in l’ané skolèr konmsa. Dizon sa lé bon pou ladministrassion é pou bann amontrèr i sorte déor pou fé lékol issi épi profite zot vakanss shé zot.

Sirésèrtin si dann in somenn i fé sho konmsa, mi oi pa koman bann marmaye i sava fé pou bien tracvaye. Mé nou la bien di lékol lé pa spéssyalman kalkilé pou zot, ni pou zot famiye, mé plito pou aranj ladministrassion.

A bon antandèr salu !

Justin