Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité
Ma ékout azot i diré sé bann kominis la dékouvèr lo réshofman klimatik é sé zot l’apré fé an sort demoun i lite kont réshofmann la. Mèm pou désèrtin rant zot sé Paul Vergès la dékouvèr sa é sé par li koméla bann gran péi i méfyé so réshofman-la avèk tout la tablatir souvan dé foi demoun i pans zot va amène pou l’imanité. Mi di soi-dizan pars a l’èr k’i lé, si mi tronp pa, réshofman klimatik la sa sé in fénomène i koné pa bien é i koné pa avèk présizyon é souvan défoi néna in pé i fé sanblan zot i koné alé oir zot i koné pa inn tyork. Tok ! Pran sa pou toué !

Justin la fé pou répons :
Mon vyé matant k’i koz la boush rouvèr, mi antann aou dir, i koné pa bien si sé l’ onm k’i provok lo réshofman klimatik, i koné pa égzak toman lé shoz é an plis ké sa bann kominis ki fé zot zésétou dann sète afèr-la, sré myé robatiz azot bann zésémèrd.
Matant mi tienbo d’rapèl aou koman bann gran zoinal, bann radyo épi bann télé la réazi kan Paul Vergès l’anons la katastrof té i pé arivé. Sa lété dann in kanpagn éléktoral é Paul Vergès la fé in konférans do prèss. Bann zoinalis té i pans li téi sava parl zéléksyon mé li la pa parlé. Li la parl sinploman la késtyonn réshofmann klima. Bann zoinalis la pans li l’avé pèrd lo nor é zot la pans Vergès téi konsidèr lo zéléksyon lé kui é sé pou sa lo prézidan lo PCR i anparl pa. Finalman zot – bann zoinalis épi l’opintyon, té konm poul dovan in kanète apré domandé kosa i lé nouvo grin mayi la é si sa i manz alé oir lo bann zésémèrd lété bien zot zour-la.
Tok ! Pran sa pou ou matant épi pou touk sak konm ou kan lo saz i amntr la line linbésil i rogard lo doi.