Konbien foi nou la antann kozman la ? In bonpé foi biensir ! Sa téi tonm sirtou dann tan demoun vant krë l’avé an kantité si tèlman k’si manzé l’avé pou manzé désèrtènn pèrsone té i manyé pa lo frin dsi késtyon la. Sépa si zot i rapèl « Faims d’enfance », in roman Aksèl Gauvin. Si zot i koné pa, lé zamé tro tar pars zot i pé lir liv la dann bibliotèk. Dann liv la, lo l’ékrivin i rakont koman inndé marmaye i manz, i manz, i arète pa dan la kantine : z’ot i manj z’ot pla épi réstan z’ot kamarad… Mi pans koméla lé shoz la shanj in pé dsi poinn vizé la, mé pétète moin lé dan l’érèr pars nana ankor d’moun la fain, isi, dann nout péi, é pa pou plézanté siouplé. Alé ! Mi lès azot réfléshi la dsi é ni artrouv pli d’van sipétadyé.