Oté

« Lé pli proférab marsh dovan in poul ké déyèr in bèf »

In kozman pou la rout

Justin / 11 séptanm 2020

JPEG - 43.6 ko

Médam zé Mésyé, La sosyété moin lé sir si zot la bien lir kozman moin la mark an-o la, zot sar dakor. Pou kosa ? Marsh dovan in poul é sèl zafèr ou i pé gingné sé kou d’bèk dann talon mé marsh déyèr in bèf lé pli danzéré pars ou i pé ramass in kou d’pate sabo é sa i pardone pa. In zistoir pou fé souri in pé pars sa i tir traka : l’avé in foi in gramoun téi amenn son sharète kann é li téi gide konm li pé son bèf apré ral in sharjman téi fé pa pityé. Momandoné bèf la marsh dsi son gro doi pyé : koupé lo doi… Figir azot, kan sokour l’arivé la trouv dann son posh vèst in gro doi d’pyé bien n oir bien a son propriyétèr. In pé i pans, avan li tonm san konésans li la trouv kouraz pou ramass son gro doi d’pyé koupé..son bien présyé. Konm pèrsone la pa vi, ni pé di konmsa. La pa tousa, mé si ni lir lo provèrb rant lé lign, sa i vé dir rant dé tablatir i fo shoizi lo pli fèb. Dann la lang fransé i di : « Entre deux maux il faut choisir le moindre. » é sé sa ké mon kozman i vé dir. Alé ! Mi kite azot rofléshi la dsi é ni artrouv pli d’van. Sipétadyé.